Tour 6 - De ole Neestadt - ole Tieden, ole Spraak

Ik laad´t jem in, mit mi op een Törn dörch dat ole Hard vun Hamborg to komen. 

Bi de dree stünnige Törn vun´ne Domplatz bet na de Spiekerstadt verkloor ik jem, wie dat angahn kann, dat ut een lütte Siedlung an´ne Alster de stootsche Hansestadt Hamburg worn is un wat dat dor mit op sik hett, dat Nedderdütsch meis nicht mehr snakt ward. Dorbi wer dat Nedderdütsche mal sowat as een Weltspraak. 

Op wat künnt jem sik op disse Törn luern?

Dropen dot wi uns op den Domplatz blangen de Petri Kark, wo glieks mol een poor Loogen Geschichte övereenanner inne Grund liggen.

An uns  Rathuus vörbi geit dat wider na de Patriosch Sellschop, bevör wi op de Trostbrüch staat un över dat Nikolaifleet kieken. Wo hüüt meis blos noch Kontorlüüd un Kieklüüd ünnerwegens sünd, hett dat fröher wimmelt vun Kooplüüd, Beerbruer, Pansenklopper, Fleetenkieker un Ewerföörers. 

Wi versetten uns in´ne ole Tieden un spörn na, wi de Minschen leevt hebbt, denn to sehn is vun de ole Neestadt nix mehr. 

Wider geit dat na de Diekstraat, wo dat groote Fuer vun 1842 sin Anfang nahmen hett.

Nu geit dat över dennTollkanal röber na de Spiekerstadt, een Wunnerwark vör de Hannelslüüd. Worüm de Laagerhüüs buut worn sind un ok noch mit smucke Gebels, Tinnen un lütten Torns utstaffert worn sünd, in een Stadt, wo een dat Reken in de Weeg leggt wurr?....hebbt jem een Idee?

An ´Enn vun uns Törn verstaht jem een beten beter worüm Hamborg dat över de veelen Johrhunnerten siet de Grünnen ümmer weer torecht kregen hett, sik niet to erfinnen, un wat för een Rull dorbi dat Nedderdütsche speelt hett.